സൗദി അറേബ്യയിൽ 4,092 പേർക്ക് കോവിഡ്

റിയാദ്∙ സൗദി അറേബ്യയിൽ 4,092 പേർക്ക് കോവിഡ് സ്ഥിരീകരിച്ചു. കൊവിഡ് ബാധിതരിൽ ഗുരുതരാവസ്ഥയിൽ കഴിയുന്നവരുടെ എണ്ണം ആയിരം കവിഞ്ഞു. ആകെ 36,940 കോവിഡ് ബാധിതരാണ് രാജ്യത്താകെ ചികിത്സയിലുള്ളത്. ഇതിൽ 1,002 പേരാണ് ഗുരുതരനിലയിലുള്ളത്. ഇവർ രാജ്യത്തെ വിവിധ ആശുപത്രികളിൽ തീവ്രപരിചരണ വിഭാഗത്തിലാണ്. ബാക്കിയുള്ളവരുടെ നില തൃപ്തികരമാണ്.

 ചികിത്സയിലുള്ളവരിൽ രണ്ടുപേർ മരിച്ചതായും ആരോഗ്യ മന്ത്രാലയം അറിയിച്ചു. ഇതുവരെ റിപ്പോർട്ട് ചെയ്യപ്പെട്ട ആകെ കോവിഡ് കേസുകളുടെ എണ്ണം 6,95,217 ഉം രോഗമുക്തരുടെ എണ്ണം 6,49,334 ഉം ആയി. ആകെ മരണസംഖ്യ 8,943 ആയി. രാജ്യത്തെ കൊവിഡ് മുക്തി നിരക്ക് 93.40 ശതമാനവും മരണനിരക്ക് 1.28 ശതമാനവുമായി. 24 മണിക്കൂറിനിടെ 145,535 ആർ.ടി-പി.സി.ആർ പരിശോധനകൾ നടത്തി.