ഗുരുഗ്രാമില്‍ കെട്ടിടം പൊളിക്കുന്നതിനിടെ തകര്‍ന്നു വീണു; രണ്ട് തൊഴിലാളികള്‍ കുടുങ്ങി

ചണ്ഡീഗഢ്: ഹരിയാന ഗുരുഗ്രാമിൽ ജീര്‍ണാവസ്ഥയിലായ കെട്ടിടം പൊളിക്കുന്നതിനിടെ തകര്‍ന്നു വീണു. അപകടത്തിൽ രണ്ട് തൊഴിലാളികള്‍ കുടുങ്ങി. ഉദ്യോഗ് വിഹാര്‍ ഫേസ് 1 ല്‍ മൂന്ന് നില കെട്ടിടം പൊളിക്കുന്നതിനിടെ തിങ്കളാഴ്ച രാവിലെ രാവിലെ 7.20ന് ആയിരുന്നു അപകടം.

കെട്ടിടം സെപ്റ്റംബര്‍ 26 മുതല്‍ പൊളിച്ചു വരികയായിരുന്നു. കെട്ടിടത്തിന്‍റെ ഒന്നാം നില പൊളിക്കുന്നതിനിടെയാണ് തകർന്നു വീണത്. അപകടസമയത്ത് 20 ഓളം തൊഴിലാളികള്‍ സ്ഥലത്തുണ്ടായിരുന്നു. സംസ്ഥാന ദുരന്ത നിവാരണ സേന (എസ്ഡിആര്‍എഫ്) രക്ഷാപ്രവര്‍ത്തനം തുടരുകയാണ്.