പത്തനാപുരം എംഎൽഎ കെ ബി ഗണേഷ് കുമാറിന്‍റെ ഓഫീസിൽ ആക്രമണം
കൊല്ലം: പത്തനാപുരം എംഎൽഎ കെ ബി ഗണേഷ് കുമാറിന്‍റെ ഓഫീസിൽ ആക്രമണം. പാർട്ടി പ്രവർത്തകന് നേരെയും ആക്രമണമുണ്ടായി. കേരളാ കോൺഗ്രസ് ബി പ്രവർത്തകന് വെട്ടേറ്റു. അക്രമിയെ ഓഫീസ് ജീവനക്കാർ കീഴ്പ്പെടുത്തി പോലീസിൽ ഏൽപ്പിച്ചു. വെട്ടേറ്റ ബിജുവിനെ സ്വകാര്യ ആശുപത്രിയിൽ പ്രവേശിപ്പിച്ചു.
വെള്ളിയാഴ്ച രാവിലെ ആറോടെയാണ് പ്രദേശവാസിയായ ആൾ അക്രമം നടത്തിയത്. അക്രമം നടത്തിയ ആള്‍ക്ക് മാനസിക അസ്വാസ്ഥ്യമുണ്ടെന്ന് പറയപ്പെടുന്നു. നിലവില്‍ പോലീസ് കസ്റ്റഡിയിലാണ് അക്രമിയുള്ളത്. ഇയാളെ വൈദ്യപരിശോധനയ്ക്ക് പുനലൂര്‍ താലൂക്ക് ആശുപത്രിയിലേക്ക് കൊണ്ടുപോയി. രാവിലെ ആറ് മണിയോടെയായിരുന്നു സംഭവം. കമുകഞ്ചേരി സ്വദേശിയായ ഉണ്ണികൃഷ്ണനാണ് അക്രമം നടത്തിയതെന്നും ഇയാള്‍ മദ്യത്തിന് അടിമയാണെന്നും പൊലീസ് പറഞ്ഞു. നേരത്തെയും ക്രിമിനൽ കേസുകളിൽ ഇയാള്‍ പ്രതിയായിട്ടുണ്ടെന്നും പൊലീസ് കൂട്ടിച്ചേര്‍ത്തു.