മെഹുല്‍ ചോക്‌സിയെ അനധികൃത കുടിയേറ്റക്കാരനായി ഡൊമനിക്ക പ്രഖ്യാപിച്ചു

സാമ്പത്തിക തട്ടിപ്പ് കേസിൽ മുങ്ങിയ വജ്രവ്യാപാരി മെഹുല്‍ ചോക്‌സിയെ അനധികൃത കുടിയേറ്റക്കാരനായി പ്രഖ്യാപിച്ച് ഡൊമനിക്ക. ഇതു സംബന്ധിച്ച ഉത്തരവ് ഡൊമനിക്ക ആഭ്യന്തര മന്ത്രാലയമാണ് പുറത്തിറക്കിയത്. പഞ്ചാബ് നാഷണല്‍ ബാങ്കില്‍ നിന്ന് 13,500 കോടിയുടെ വായ്പാ തട്ടിപ്പ് നടത്തി നാടുവിട്ട ചോക്‌സി ആന്റിഗ്വ പൗരത്വവുമായി 2018 മുതല്‍ ഇവിടെ താമസിക്കുകയാണ്.

മെയ് 23ന് ആന്റിഗ്വയില്‍ നിന്ന് അനുമതിയില്ലാതെ ഡൊമനികയിലേക്ക് സുഖവാസത്തിന് എത്തിയതാണ് മെഹുല്‍ ചോക്‌സിക്ക് കുരുക്കായത്. അനധികൃത കുടിയേറ്റക്കാരനായ ചോക്‌സിയെ സ്വദേശത്തേക്ക് തിരിച്ചയക്കാനുള്ള നടപടികള്‍ സ്വീകരിക്കുന്നതിനായി പൊലീസ് മേധാവിക്ക് നിര്‍ദേശം നല്‍കിയതായും ഡൊമനിക്കന്‍ മന്ത്രി റെയ്‌ബേണ്‍ ബ്ലാക്ക്മൂര്‍ പുറത്തിറക്കിയ ഉത്തരവില്‍ പറയുന്നു.