അസീസിനെയും സഹോദരനെയും അന്നേ ദിവസം കണ്ടത് അതേ വസ്ത്രത്തില്‍
കൊലപാതകമെന്ന് അന്നേ നാട്ടുകാര്‍ ഉറപ്പിച്ച് മരണമായിരുന്നു നാദാപുരത്തെ അസീസിന്‍റേത്.ആദ്യം ലോക്കല്‍ പൊലീസും പിന്നീട് ക്രൈംബ്രാഞ്ചും സംഘവും അന്വേഷിച്ചെങ്കിലും ആത്മഹത്യയാണെന്ന നിഗമനത്തിലാണ് എത്തിയത്. പക്ഷേ കഴിഞ്ഞ ദിവസം പുറത്തുവന്ന വീഡിയോയിലാണ് കുട്ടിയെ സഹോദരന്‍ കഴുത്തു ഞെരിച്ച് കൊല്ലുകയായിരുന്നു എന്ന് വ്യക്തമാകുന്ന തെളിവുകള്‍ പുറത്തുവന്നത്.
കോഴിക്കോട് നാദാപുരത്ത് നരിക്കാട്ടേരി സ്വദേശി കറ്റാരത്ത് അസീസിനെ 2020 മെയ് 17നാണ് വീട്ടിനകത്ത് ഫാനില്‍ തൂങ്ങി മരിച്ച നിലയില്‍ കണ്ടെത്തിയത്.അപ്രതീക്ഷിതമായിട്ടാണ് സഹോദരന്‍ സഫ്‍വാന്‍ അസീസിന്‍റെ കഴുത്ത് ഞെരിക്കുന്ന വീഡിയോ കഴിഞ്ഞ ദിവസം സോഷ്യല്‍ മീഡിയയിലൂടെ പുറത്ത് വന്നത്. അസീസിന്‍റെ കുടുംബാംഗങ്ങളിലാരോ ഒരാളാണ് ഈ വീഡിയോ പകര്‍ത്തിയിരിക്കുന്നത്. ശ്വാസം മുട്ടി സഫ്‍വാന്‍റെ മടിയില്‍ കിടന്ന് അസീസ് പിടയുന്നത് ആ ദൃശ്യങ്ങളില്‍ നിന്ന് വ്യക്തമാണ്.
മരണവിവരമറിഞ്ഞ് നാട്ടുകാര്‍ അസീസിന്‍റെ വീട്ടിലെത്തുമ്പോള്‍ അസീസിന്‍റെ ദേഹത്തുള്ള വസ്ത്രവും സഫ്‍വാന്‍ ധരിച്ച വസ്ത്രവും തന്നെയാണ് പുറത്തു വന്ന വീഡിയോയിലുള്ളത് എന്ന് ആക്ഷന്‍ കമ്മിറ്റി പ്രതിനിധികള്‍ പറയുന്നു. സഫ്‍വാന്‍ അസീസിന്‍റെ അര്‍ധസഹോദരനാണ്.