'മാമാങ്കം' ടീം വീണ്ടും; മമ്മൂട്ടിയെ നായകനാക്കി അടുത്ത ബിഗ് ബജറ്റ് ചിത്രമൊരുക്കാൻ വേണു കുന്നപ്പിള്ളി
മമ്മൂട്ടിയെ നായകനാക്കി മറ്റൊരു ബിഗ് ബജറ്റ് ചിത്രമൊരുക്കാൻ നിർമ്മാതാവ് വേണു കുന്നപ്പിള്ളി. നിർമാതാവ് ആന്റോ ജോസഫ് ആണ് ഇക്കാര്യം വ്യക്തമാക്കിയത്.സിനിമയില്‍ അന്‍പതാണ്ട് പൂര്‍ത്തിയാക്കുന്ന മമ്മൂട്ടിയ്ക്ക് ബിജെപിയുടെ ആദരം അര്‍പ്പിക്കാന്‍ പാര്‍ട്ടി സംസ്ഥാന പ്രസിഡന്‍റ് കെ സുരേന്ദ്രന്‍ മമ്മൂട്ടിയുടെ വീട്ടിലെത്തിയപ്പോള്‍ വേണു കുന്നപ്പിള്ളിയും അവിടെ ഉണ്ടായിരുന്നു. സുരേന്ദ്രന്‍ പങ്കുവച്ച ചില ചിത്രങ്ങളില്‍ നിന്ന് നിര്‍മ്മാതാവിനെ തിരിച്ചറിഞ്ഞ ആരാധകര്‍ സോഷ്യല്‍ മീഡിയയില്‍ പുതിയ പ്രോജക്റ്റ് ആണോ എന്ന സംശയം പ്രകടിപ്പിച്ചിരുന്നു. നിര്‍മ്മാതാവ് ആന്റോ ജോസഫ് ആണ് ആലോചനാഘട്ടത്തിലുള്ള ഈ പ്രോജക്റ്റ് കണ്‍ഫേം ചെയ്‍തിരിക്കുന്നത്.
"അഭിനയജീവിതത്തിലെ അരനൂറ്റാണ്ട് പൂർത്തീകരിച്ച മമ്മൂക്കയെ അനുമോദിക്കാൻ ബി.ജെ.പി സംസ്ഥാന അധ്യക്ഷൻ കെ. സുരേന്ദ്രൻ എത്തിയപ്പോൾ മലയാളത്തിലെ ഏറ്റവും മുതൽമുടക്കുള്ള മമ്മൂട്ടി ചിത്രത്തിന്റെ നിർമാതാവ് വേണു കുന്നപ്പിള്ളിയും (കാവ്യാ ഫിലിംസ്) ചേർന്നെടുത്തൊരു ഫോട്ടോ. മമ്മൂക്കയോടൊപ്പമുള്ള അടുത്ത ബിഗ് ബഡ്ജറ്റ് ചിത്രത്തിന്റെ പ്രാരംഭ ചർച്ചകൾക്ക് എത്തിയതായിരുന്നു വേണു കുന്നപ്പിള്ളി."ആന്റോ കുറിച്ചു
എം പത്മകുമാര്‍ സംവിധാനം ചെയ്‍ത പിരീഡ് ആക്ഷന്‍ ചിത്രമായ 'മാമാങ്കം' 2019ലാണ് പ്രദര്‍ശനത്തിനെത്തിയത്. ചന്ദ്രോത്ത് വലിയ പണിക്കര്‍ എന്ന കഥാപാത്രമായി മമ്മൂട്ടി എത്തിയ ചിത്രത്തില്‍ ഉണ്ണി മുകുന്ദന്‍, അച്യുതന്‍ ബി നായര്‍, സിദ്ദിഖ്, പ്രാചി തെഹ്‍ലാന്‍, സുരേഷ് കൃഷ്‍ണ, മണിക്കുട്ടന്‍, സുദേവ് നായര്‍, കനിഹ, അനു സിത്താര. ഇനിയ തുടങ്ങി വലിയ താരനിരയും ഉണ്ടായിരുന്നു.